Ul bordiki, ishrat orzu qilg‘aysen,

Ishrat tilamaklikta g‘ulu qilg‘aysen.

Chun ayshu farog‘ mumkin ermas zinhor,

Bobur, g‘amu mehnat bila xo‘ qilg‘aysen.

 

***

Аhbobg‘a har xatki, savod etgaysen,

Bizni dag‘i ul bitikda yod etgaysen.

Maqsudki, qosidi agar kelsa bu yon

Bir noma bila ko‘ngulni shod etgaysen.

 

***

Hijronda sog‘inib, meni shod etgaysen,

Men xastani muxlis e’tiqod etgaysen.

Bu xatni aning uchun bitidim munda,

Ko‘rgach bu xatimni meni yod etgaysen.

 

***

Necha manga javr muttasil qilg‘aysen?

Mehring yo‘qu necha munfail qilg‘aysen?

Javringni ko‘rub, mehringni ko‘rmay kettim,

Gar ko‘rsamu ko‘rmasam bihil qilg‘aysen.

 

***

Rahmingni ko‘ngul tilar, ango qilg‘aysen,

Zaxmingni ko‘ngulga bexato qilg‘aysen.

Til ikki alif ko‘ksuma, na’l o‘rtadakim,

Ko‘nglum tilarin haqin ado qilg‘aysen.