Jon vola erur la’li shakarboringg‘a,

Ko‘nglum ham erur xarob ruxsoringg‘a.

Guftoring erur boshdin-ayoq borchasi xub,

Men banda bo‘lay boshtin-ayoq boringg‘a.

 

***

Ey oy, yuzung olida quyosh sharmanda,

Shirin so‘zu yaxshi xulqungga men banda,

Hijronda necha noma bila so‘zlashaling,

Yo sen beri kel, yo borayin men anda.

 

***

Necha bu falak solg‘usi g‘urbatqa meni,

Har lahza tugangusiz mashaqqatqa meni.

Ne chora qilay, netayki, Tengri go‘yo,

Mehnatni menga yorotti, mehnatqa meni.

 

***

Bedard habib bilmadi dardimni,

Tufroqcha ko‘rmadi ruxi zardimni.

Mendin necha ko‘nglida g‘ubori bo‘lg‘ay,

Kettim muna, emdi topmag‘ay gardimni.

 

***

Ko‘ngli tilagan murodig‘a yetsa kishi,

Yo borcha murodlarni tark etsa kishi.

Bu ikki muyassar o‘lmasa olamda,

Boshini olib bir sorig‘a ketsa kishi.