Xayol etsam ul belni, hol eltadur,

Meni beli sori xayol eltadur.

Qadining xayolin ko‘z asrab magar,

Ko‘ngul ravzasig‘a nihol eltadur?

 

***

Ey xush ulkim, qilsa g‘amdin ko‘nglini ogoh, ishq,

Aylasa beg‘amlig‘ining qissasin ko‘toh, ishq.

Vah, ne kun bo‘lg‘ayki, qovlab aqlu donish xaylini,

Bo‘lsa jon birla ko‘ngulning kishvarida shoh ishq.

 

***

Safar azmini qilding, men boraolmay turub qoldim,

Nazar lutfini qilding mendinu men telmurub qoldim.

Aningdek tund surdi xajr raxshin ul qaroko‘zluk,

Yiroqtin yuz alam birla qarosini ko‘rub qoldim.

 

***

Seni ko‘rmaslik ko‘ngulga g‘am edi, jonimg‘a ham,

G‘ayrning ko‘rmakligi bo‘ldi alam uzra alam.

Yo sening ko‘rmakligingdin g‘ayr bo‘lsa erdi daf’,

Yo seni ko‘rmaydururmen, g‘ayrni ham ko‘rmasam.

 

***

Qadi furqati meni duto qilur,

Qoshi hajri qomatimni yo qilur,

Necha g‘ayrg‘a ul oy vafo qilur?

Necha jonima mening jafo qilur?