Gul jamolin yopqon ul gulning iki rayhonidur,

G‘uncha sirrin ochqon ul ikki labi xandonidur.

 

Ul musalsal ikki zulfi gul yuzining davrida,

Gul uza og‘nar, magar ul ikkining davronidur?

 

O‘qi zaxmini ko‘rub har yon tanimda, el degay –

Kim, bu ko‘hi dardning ul lolai Nu’monidur.

 

Sel emastur, yer yuzin tutqon ko‘zumning yoshidur!

Ra’d emastur, ko‘kka chirmashqon ko‘ngul afg‘onidur!

 

Lojaram, bo‘lg‘ay parishonu havoyi men kibi

Zarra yanglig‘ kimki bir xurshid sargardonidur.

 

Ul pari ishqida, Bobur, qo‘nglum andoq telbadur–

Kim, sochi zanjiridur, chohi zaqan zindonidur.