Chiqsa quyosh falakka, sen otqa chiqqaningdek,

Bo‘lg‘aymu ul seningdek, ul biri tavsaningdek?

 

Ko‘ksumni chunki yording, kirgil ko‘ngulgakim, bor –

Ul yora eshigingdek, ko‘z anda ravzaningdek.

 

Gar siym bargi gulni qilsa libos o‘ziga,

Bo‘lg‘aymu, ey gulandom, ko‘nglak bila taningdek?

 

Ul yor hazratinda bisyor yaxshidur g‘ayr6,

Men ham yamon emon, lek yaxshi emon aningdek.

 

Da’viyi ishq etib g‘ayr, Boburni ayb qilma –

Kim, men edim seningdek, sen bo‘lg‘asen meningdek.