Jamoling vasfini, ey oy, necha eldin eshitgaymen,

Ne kun bo‘lg‘ay, visolingg‘a meni dilxasta yetgaymen.

 

Tarahhum yuzidin yuzungni ko‘rmakka buyurg‘aysen,

Xush ulkim, orazingni ko‘rgamen, so‘zung eshitgaymen.

 

Itingdurmen, soching zanjirini bo‘ynumg‘a mahkam qil –

Ki, vodiyi firoqing ichra qo‘rqarmenki, yitgaymen.

 

Tarahhum qilmasang, yo boqmay, istig‘no bila o‘tsang,

Tazarru’ qilg‘amen, yo yig‘lag‘aymen, o‘zga netgaymen?

 

Muyassar bo‘lmasa boshimni qo‘ymog‘lig‘ oyog‘ig‘a,

Boshimni olib, ey Bobur, oyoq yetgancha ketgaymen.