Sinov yoʻsinida ishlamoqda
Jonima o‘t soldi ul ruxsorai zebo yana,
Ko‘ngluma ul zulf bo‘ldi moyai savdo yana.
Ko‘rsatib ruxsoru zulfin ul paripaykar manga,
Jonu ko‘nglumni qilibtur volavu shaydo yana.
Yor ko‘yindagi tom, sensen menga pushtu panoh,
Soyai lutfungni sol, chun sanga keldim to yana.
Shodliqni-yu farog‘atni qo‘yub oshiq bo‘lub,
Mehnatu g‘amni qilibmen o‘zuma paydo yana.
Yorg‘a qulmen degach Boburni rasvo ayladi,
Tengri mendek bandasini qilmasun rasvo yana.