Gar Ruhdam etsa erdi ohangi nag‘am,

Majlista ne huzn qolur erdiyu ne g‘am.

To borg‘ali Ruhdam bizing majlisdin,

Majlis eliga ne ruh qoldi-yu, ne dam.

Bemehr desa el seni, men butmas edim,

Hargiz bu sifatni senga yovutmas edim.

Nohaq og‘rib, meni unuttung oxir,

Vallohki, sendin bu tama’ tutmas edim.

Bu olam aro ajab alamlar koʼrdum,

Olam elidin turfa sitamlar koʼrdum,

Har kim bu «Vaqoeʼ»ni oʼqur, bilgaykim,

Ne ranju ne mehnatu ne gʼamlar koʼrdum.

Bu chehrai zardimdin uyolsang, netgaymen?

Rahmat nazarini manga solsang, netgaymen?

Bir ishva bila koʼngul berib Boburgʼa,

Bir boʼsa bila koʼnglini olsang, netgaymen?

Beqaydmenu harobi siym ermasmen,

Ham mol yigʼishtirur laim ermasmen.

Kobulda iqomat etti Bobur, dersiz,

Аndoq demangizlarki, muqim ermasmen.

Ul bordiki, ishrat orzu qilg‘aysen,

Ishrat tilamaklikta g‘ulu qilg‘aysen.

Chun ayshu farog‘ mumkin ermas zinhor,

Bobur, g‘amu mehnat bila xo‘ qilg‘aysen.

Xush ulki, kelib yonimda o‘lturg‘aysen,

Yo bir nafas ollimda kelib turg‘aysen.

Og‘zingg‘a o‘par so‘zin bitiy olmasmen,

Borg‘on kishidin og‘iz so‘zin so‘rg‘aysen.

Jonimda mening hayoti jonim sensen,

Jismimda mening ruhi ravonim sensen.

Boburni seningdek o‘zga yo‘q yori azizi,

Аlqissaki, umri jovidonim sensen.

El suhbatiniki, orzu qilmishmen,

Ne xushlug‘ ila bu guftugo‘ qilmishmen.

Ishrat bila ayshni ne ish qilg‘aymen,

Menkim, g‘amu mehnat bila xo‘ qilmishmen.

Ishq ishini boshtin yana bunyod etayin,

Ishqing g‘ami birla xotirim shod etayin.

Debsenki, unutma meni hijron aro, voy,

Seni unutub, ne kishini yod etayin?!

Nisyon qalamin necha menga surgaysan,

Vaqt o‘ldiki, hajr nomasin burgaysen.

Budur tilagim – xatimni chun ko‘rgaysen,

Аlbatta, o‘zungni manga yetkurgaysen!

Muncha meni zor, ey yuzi xurshed, etma,

Furqat alamini menga jovid etma.

Tengridin agar sening umiding bordur,

Tengri uchun, ey oy, meni navmid etma.

Sen anda farog‘u ayshu ishrat birla,

Men munda xarobu ranju mehnat birla.

Аsrarmen o‘zum birla seni naqsh qilib,

Xursand bo‘lurmen ushbu suvrat birla.

Dunyo borisi manga musaxhar bo‘lsa,

Uqboda dog‘i Xudoy yovar bo‘lsa.

Budur tilagim ikki jahonda Haqdin,

Har ne tilasam, bori muyassar bo‘lsa!

Jon vola erur la’li shakarboringg‘a,

Ko‘nglum ham erur xarob ruxsoringg‘a.

Guftoring erur boshdin-ayoq borchasi xub,

Men banda bo‘lay boshtin-ayoq boringg‘a.

Yod etmas emish kishini g‘urbatta kishi,

Shod etmas emish ko‘ngulni mehnatta kishi.

Ko‘nglum bu g‘aribliqda shod o‘lmadi, oh,

G‘urbatta sevunmas emish, albatta, kishi.